இந்தியாவின் SDG இலக்கு வாரியான திட்டங்கள் - இலக்கு1:வறுமையின்மை (Part-1)

 SDG இலக்கு

ஐக்கிய நாடுகளின் நிலையான மேம்பாட்டு இலக்குகள்

• ஐக்கிய நாடுகளின் நிலையான மேம்பாட்டு இலக்குகள் (SDGs) 2015 ஆம் ஆண்டு செப்டம்பர்  மாதத்தில், மொத்தமாக 193 அனைத்து  உறுப்பு நாடுகளாலும் ஏற்றுக் கொள்ளப்பட்டன.
• இந்த இலக்குகள் 2030 ஆம் ஆண்டிற்குள் அமைதி, செழிப்பு மற்றும் பூமியின் பாதுகாப்பை மேம்படுத்துவதற்கான உலகளாவிய நிகழ்ச்சி நிரலின் ஒரு பகுதியாகும்.
• வறுமை, பசி, சுகாதாரம், கல்வி, காலநிலை மாற்றம், பாலினச் சமத்துவம், சுத்தமான நீர் மற்றும் சமூக நீதி போன்ற பல்வேறு உலகளாவியச் சவால்களை எதிர்கொள்ளும் வகையில், ஒவ்வொன்றும் குறிப்பிட்ட இலக்குகளுடன் மொத்தமாக 17 இலக்குகள் உள்ளன.

• SDGகளின் முக்கிய நோக்கம் மிகவும் நிலையான, உள்ளடக்கிய மற்றும் அனைவருக்கும் சமமான உலகத்தை உருவாக்குவதாகும்.

நோக்கம்:

• வறுமையை அனைத்து இடங்களிலும், அதன் அனைத்து வடிவங்களிலும் முடிவுக்குக் கொண்டு வருவதாகும்.
• பட்டினியின்மை - அனைவருக்கும் சத்தான உணவு கிடைப்பதை உறுதி செய்தல்.
• அனைவருக்கும் நல்ல ஆரோக்கியம் மற்றும் நல்வாழ்வு.
• அனைவருக்கும் தரமான கல்வி, வாழ்நாள் முழுவதும் கற்றலை ஊக்குவிக்கிறது.
• பாலினச் சமத்துவம் மற்றும் அனைத்துப் பெண்கள் மற்றும் சிறுமிகளுக்கு அதிகாரம் அளித்தல்.
• அனைவருக்கும் சுத்தமான குடிநீர் மற்றும் சுகாதாரம்.
• அனைவருக்கும் மலிவான மற்றும் சுகாதாரமான ஆற்றல்.
• கண்ணியமான வேலை மற்றும் பொருளாதார வளர்ச்சி.
• தொழிற்சாலை, புத்தாக்கம் மற்றும் உள்கட்டமைப்பு.
• நாடுகளுக்குள்ளும் நாடுகளுக்கிடையிலும் குறைக்கப்பட்ட ஏற்றத்தாழ்வுகள்.
• வளம் குன்றா நகரங்கள் மற்றும் சமூகங்கள்.
• பொறுப்பான முறையில் நுகர்வு மற்றும் உற்பத்தி.
• காலநிலை மாற்றத்தை எதிர்கொள்வதற்கான காலநிலை நடவடிக்கை.
• நீரினுள் வாழ்பவை - கடல் வளங்களைப் பாதுகாத்தல்.
• நிலத்தில் வாழ்பவை - சுற்றுச்சூழல் மற்றும் பல்லுயிர்ப் பாதுகாப்பு.
• அமைதி, நீதி மற்றும் சிறந்த நிறுவனங்கள்.
• இலக்குகளுக்கான கூட்டாண்மை - உலகளாவிய ஒத்துழைப்பை வலுப்படுத்துதல்.

• நிலையான மேம்பாட்டு இலக்குகள் யாரும் பின்தங்கியிருக்கக் கூடாது என்பதோடு எதிர்காலச் சந்ததியினருக்கு பூமியினைப் பாதுகாப்பதை உறுதி செய்கிறது.
• அவை அரசாங்கங்கள், வணிகங்கள் மற்றும் தனிநபர்களின் செயல்களுக்கு வழி காட்டுகின்றன.

இந்தியா மற்றும் நிலையான வளர்ச்சி இலக்குகள்

• இந்தியா, மிகப்பெரிய மற்றும் அதிக மக்கள் தொகை கொண்ட நாடுகளில் ஒன்றாக, ஐக்கிய நாடுகளின் நிலையான மேம்பாட்டு இலக்குகளை (SDGs) அடைவதில் தீவிரமாகச் செயல்பட்டு வருகிறது.
• இந்தியாவின் பரந்த மற்றும் மாறுபட்ட சமூக-பொருளாதார நிலப்பரப்பு, இந்த இலக்குகளை அடைவதில் தனித்துவமானச் சவால்களை எதிர்கொள்கிறது.
• நாட்டின் பெரிய மக்கள்தொகை, பிராந்திய ஏற்றத்தாழ்வுகள் மற்றும் பரவலான வறுமை ஆகியவை நிலையான மேம்பாட்டு நன்மைகள் அனைத்து குடிமக்களையும் சென்றடைவதை உறுதி செய்வதை கடினமாக்குகிறது.
• எவ்வாறாயினும், இந்த உலகளாவிய நோக்கங்களை முன்னேற்றுவதற்கு இந்தியாவும், அதன் வளர்ந்து வரும் பொருளாதாரம் மற்றும் இளைஞர்களின் மக்கள் தொகை ஆகியனவும் குறிப்பிடத் தக்க வாய்ப்புகளைக் கொண்டுள்ளது.
• SDG களுக்கான இந்தியாவின் அணுகுமுறை அதன் குறிப்பிட்டத் தேவைகளுக்கு ஏற்றதாக இருக்க வேண்டும் என்பதோடு கிராமப்புற-நகர்ப்புறப் பிளவுகள், சுகாதார அணுகல், சுற்றுச்சூழல் நிலைத்தன்மை மற்றும் பொருளாதார உள்ளடக்கம் போன்ற பிரச்சினைகளிலும் கவனம் செலுத்த வேண்டும்.

• நல்ல முன்னேற்றம் ஏற்பட்டாலும், 2030 ஆம் ஆண்டிற்குள் SDGகளை அடைவதற்கு அனைத்துத் துறைகளிலும் தொடர்ச்சியான கண்டுபிடிப்பு மற்றும் முயற்சி தேவைப்படுகிறது.

இந்தியாவின் SDG இலக்கு வாரியான திட்டங்கள்

SDG இலக்கு 01 – வறுமையின்மை

1. மகாத்மா காந்தி தேசிய ஊரக வேலைவாய்ப்பு உறுதித் திட்டம் (MGNREGS)

ஆண்டு:

• 2005 ஆம் ஆண்டு தொடங்கப்பட்டது.

அமைச்சகம் அல்லது தலைமை முகமை:

• ஊரக வளர்ச்சித் துறை அமைச்சகம்

நோக்கம்:

• ஒரு நிதியாண்டில், திறமையற்ற உடலுழைப்புத் தொழிலில் ஈடுபடும் வயது வந்த உறுப்பினர்கள் உள்ள ஒவ்வொரு கிராமப்புறக் குடும்பத்திற்கும், குறைந்தபட்சம் 100 நாட்களுக்கு உத்தரவாதமான கூலி வேலைவாய்ப்பை வழங்குதல்.
• கிராமப்புறங்களில் நீடித்தச் சொத்துக்களை உருவாக்குதல்.

• கூலி வேலை வாய்ப்புகளை வழங்குவதன் மூலம் கிராமப்புறக் குடும்பங்களின் வாழ்வாதாரப் பாதுகாப்பை மேம்படுத்துதல்.

பயனாளி:

• அனைத்துக் கிராமப்புறக் குடும்பங்களும், குறிப்பாக 18 வயது மற்றும் அதற்கு மேற்பட்ட வயதுடையவர்கள், திறமையற்ற உடலுழைப்புத் தொழிலை செய்யத் தயாராக உள்ளவர்கள்.
• இதில் பயனாளிகளில் குறைந்தது மூன்றில் ஒரு பங்காவது பெண்கள் இருக்க வேண்டும் என்ற நிலையில் இதில் பெண்களுக்கு முன்னுரிமை அளிக்கப்படுகிறது,.

தகுதி:

• கிராமப்புறக் குடும்பங்களில் உள்ள (நகர்ப்புற மாவட்டங்களைத் தவிர) வயது வந்தோர்கள், திறமையற்ற ரீதியிலான உடல் உழைப்பில் ஈடுபடத் தயாராக உள்ள நபர்கள்.
• பழங்குடியினர் குடும்பங்கள் மற்றும் இயற்கைப் பேரிடர்களை எதிர்கொள்ளும் பகுதிகளுக்கான சிறப்பு ஏற்பாடுகள் செய்யப்பட்ட பகுதியில் உள்ள நபர்கள் (எ.கா. வறட்சி).

பலன்கள்:

• ஒரு நிதியாண்டில் ஒரு குடும்பத்திற்கு குறைந்தபட்சம் 100 நாட்கள் வேலைவாய்ப்பு உத்தரவாதத்தை அளிக்கிறது.
• விண்ணப்பித்த 15 நாட்களுக்குள் வேலையைக் கோருவதற்கும், பெறுவதற்கும் உரிமையை அளிக்கிறது.
• சரியான நேரத்தில் வேலை வழங்கப்படாவிட்டால் (15 நாட்களுக்குள்) வேலையின்மை உதவித் தொகைக்கான உரிமையை வழங்குகிறது.
• மருத்துவ உதவி, குடிநீர், நிழல் அமைப்பு போன்ற அத்தியாவசியப் பணியிட வசதிகளுக்கான உரிமையை தருகிறது.
• மாநிலங்களுக்கு மாநிலங்கள் என்று சில குறிப்பிட்ட மாறுபாடுகளுடன் கிராமப்புறங்களில் பணவீக்கத்தைப் பிரதிபலிக்கும் வகையில் விவசாயத் தொழிலாளர்களுக்கான நுகர்வோர் விலைக் குறியீட்டின் (CPI-AL) அடிப்படையிலான ஊதிய விகிதங்கள்.
• சமீபத்திய ஊதிய விகித உயர்வு: 2024-2025 ஆம் ஆண்டில், திறமையற்ற உடலுழைப்புத் தொழிலாளர்களுக்கான ஊதிய விகிதங்கள் மாநிலத்தைப் பொறுத்து 3-10% வரை அதிகரிக்கப் பட்டுள்ளன.

• இயற்கைச் சீற்றங்கள் அல்லது பாதிக்கப்படக் கூடிய குறிப்பிட்ட குடும்பங்களுக்கு (எ.கா. பட்டியலிடப் பட்டப் பழங்குடியினர்) கூடுதலாக 50 நாட்கள் வேலை வழங்குகிறது.
• ஊதிய மட்டத்தில் ஊதியம் மற்றும் பொருள் விகிதம் 60:40 ஆக நிர்ணயிக்கப்பட்டுள்ளது.
• இத்திட்டத்தின் கீழ் அனைத்துத் திட்டங்களுக்கும் கிராம சபைகள் மூலம் சமூகத் தணிக்கை செய்யப் படுகிறது.
• இத்திட்டத்தின் கீழ் உருவாக்கப்பட்டச் சொத்துக்களைப் புவியிடக் குறியீடாகச் செய்தல்.

கூடுதல் தகவல்:

• சொத்துக்களின் புவியிடக் குறியீடு: சொத்துகளின் உருவாக்கத்தைக் கண்காணிக்க இந்திய விண்வெளி ஆராய்ச்சி மையம் (ISRO) மற்றும் தேசியத் தொலை உணர்தல் மையத்துடன் (NRSC) இணைந்து புவி MGNREGA என்ற வசதியினைப் பயன்படுத்துதல்.
• சமூக தணிக்கை: வெளிப்படைத்தன்மை மற்றும் பொறுப்புணர்வுக்காக கிராம சபையின் வழக்கமான தணிக்கைகள்.
• ஜன்மன்ரேகா: MGNREGA சொத்துக்களின் செயல்திறன் மற்றும் தாக்கத்தை மதிப்பிடுவதற்கான குடிமக்களின் கருத்துக் கருவி.

• திட்டம் 'UNNATI': MGNREGA பயனாளிகள் பகுதி நேர வேலைவாய்ப்பிலிருந்து முழு நேர வேலை வாய்ப்பிற்கு மாற உதவும் ஒரு திறன் முயற்சி.

• ஒப்பந்ததாரர் இல்லாத மாதிரி அமைப்பு: MGNREGS திட்டத்தின் கீழ் எந்த ஒப்பந்ததாரர்களும் அனுமதிக்கப்பட மாட்டார்கள்; எனவே அனைத்து வேலைகளும் உள்ளூர்ச் சமூகத்தால் நேரடியாக செயல்படுத்தப்படுகின்றன.

2. தீன்தயாள் அந்த்யோதயா யோஜனா - தேசிய கிராமப்புற வாழ்வாதாரப் பணி (DAY-NRLM)

ஆண்டு:

• 2010 ஆம் ஆண்டு தொடங்கப்பட்டது (2016 ஆம் ஆண்டு பெயர் மாற்றம் செய்யப் பட்டது)

அமைச்சகம் அல்லது தலைமை முகமை:

• ஊரக வளர்ச்சித் துறை அமைச்சகம், இந்திய அரசு.

நோக்கம்:

• வறுமையைக் குறைப்பதன் மூலம் ஏழைக் குடும்பங்களுக்கு ஆதாயமான சுயதொழில் மற்றும் திறமையான கூலி வேலை வாய்ப்புகளை வழங்குவதன் மூலம் நிலையான மற்றும் பன்முகப் படுத்தப் பட்ட வாழ்வாதார விருப்பங்களுக்கு வழி வகுத்தல்.

• இத்திட்டம் முதன்மையாகப் பெண்களைக் குறி வைத்து அவர்களுக்கான சுய உதவிக் குழுக்களை (SHGs) உருவாக்குவதன் மூலம் அவர்களுக்கு அதிகாரம் அளிக்கிறது என்பதோடு அவை நிதிச் சேவைகளை வழங்குவதற்கும், வாழ்வாதாரத்தை மேம்படுத்துவதற்கும் வேண்டிய வகையிலான நிறுவனங்களாகச் செயல்படுகின்றன.

• இந்தத் திட்டம் முறையான கடன், வாழ்வாதார பல்வகைப்படுத்தல் மற்றும் பொதுச் சேவைகள் மற்றும் உரிமைகளுக்கான அணுகலை ஊக்குவிக்கிறது.

பயனாளி:

• கிராமப்புற ஏழைக் குடும்பங்கள், குறிப்பாக சுய உதவிக் குழுக்கள் (SHGs) மூலம் பெண்களுக்கு அதிகாரம் அளிப்பதில் கவனம் செலுத்துகின்றன.

• இந்தக் குழுக்களின் உருவாக்கம் மற்றும் நிர்வாகத்தில் பெண்களின் தீவிர ஈடுபாட்டுடன், அனைத்துக் கிராமப்புற ஏழை குடும்பங்களையும், சுய உதவிக் குழுக்களாக அணிதிரட்டுவதை இந்த திட்டம் நோக்கமாகக் கொண்டுள்ளது.

தகுதி:

• கிராமப்புறக் குடும்பங்கள், குறிப்பாக வறுமைக் கோட்டிற்கு கீழே உள்ள குடும்பங்கள்.
• ஒவ்வொரு சுய உதவிக் குழுவும் பெண்களைக் கொண்டதாக உள்ள வகையில் வறுமைக் கோட்டிற்கு கீழே உள்ள குடும்பங்களைச் சேர்ந்த பெண்கள்.
• பல பாதிப்புகளை எதிர்கொள்ளும் விளிம்புநிலைச் சமூகங்கள் மற்றும் குடும்பங்களுக்கு சிறப்பான முக்கியத்துவம் கொடுக்கப் படுகிறது.

பலன்கள்:

• முறையான கடன் மற்றும் வங்கி இணைப்புகள் உட்பட நிதிச் சேவைகளுக்கான அணுகல்.
• வாழ்வாதாரத்தைப் பல்வகைப்படுத்துதல் மற்றும் வலுப்படுத்துதல் ஆகியவற்றுக்கான ஆதரவு.
• கிரிஷி சாகிஸ் (சாகிஸ் - உதவியாளர்கள்), பசு சாகிஸ் மற்றும் பேங்க் சாகிஸ் போன்ற சமூக வள நபர்கள் (CRPs) மூலம் பெண்களுக்குப் பயிற்சி, திறன் மேம்பாடு மற்றும் அதிகாரமளித்தல்.

• உறுப்பினர்களின் கடன் தேவைகளைப் பூர்த்தி செய்வதற்கும் வங்கி நிதியைப் பெறுவதற்கும் சுய உதவிக் குழுக்களுக்கு ₹10,000-15,000 சுழலும் நிதிகள் (RF) வழங்குதல்.
• குழு மட்டத்தில் கூட்டு நடவடிக்கைகளுக்காக, சமூக முதலீட்டு நிதி மூலம் SHG கூட்டமைப்புகளுக்கு ஆரம்ப மூலதனத்தை அளித்தல்.

• சுயதொழில் மற்றும் வேலை வாய்ப்புகளை மேம்படுத்த கிராமப்புற இளைஞர்களுக்குத் திறன் மேம்பாடு மற்றும் பயிற்சி.

கூடுதல் தகவல்:

முக்கிய அம்சங்கள்:

• SHG உருவாக்கம்: வங்கி இணைப்பு ஏற்பாடுகளில் கவனம் செலுத்தும் வகையில் ஒவ்வொரு கிராமப்புற ஏழை குடும்பத்திலிருந்தும் ஒரு பெண் சுய உதவிக் குழுவில் (SHG) இருப்பார்.

நான்கு முக்கியக் கூறுகள்:

• சமூக அணி திரட்டல் மற்றும் திறன் மேம்பாடு: கிராமப்புறச் சமூகங்களை மேம்படுத்துதல் மற்றும் நிறுவனங்களை உருவாக்குதல்.
• நிதி உள்ளடக்கம்: நிதிச் சேவைகளுக்கான அணுகலை உறுதி செய்தல்.
• வாழ்வாதார மேம்பாடு: நிலையான வாழ்வாதாரங்கள் மற்றும் சந்தை இணைப்புகளுக்கான ஆதரவு.
• ஒருங்கிணைப்பு: முழுமையான வறுமைக் குறைப்புக்கான பல்வேறு அரசாங்கத் திட்டங்களுடன் ஒத்துழைத்தல்.
• திறன் மேம்பாடு: கிராமப்புறச் சுய வேலைவாய்ப்பு பயிற்சி நிறுவனங்கள் (RSETIs) மூலம் கிராமப்புற இளைஞர்களுக்கு வேலைவாய்ப்பு மற்றும் சுய வேலைவாய்ப்புக்கானப் பயிற்சி அளித்தல்.
• பண்ணை வாழ்வாதாரங்கள்: மகிளா கிசான் சசக்திகரன் பரியோஜனா (MKSP) மற்றும் பிற விவசாயத் தலையீடுகள் மூலம் விவசாயம் சார்ந்த வாழ்வாதாரங்களுக்கு முக்கியத்துவம் அளித்தல்.
• சமூக வள நபர்கள் (CRPs): விவசாயம் (கிருஷி சாகிஸ்), கால்நடைகள் (பசு சாகிஸ்), வங்கி (வங்கி சாகிஸ்) போன்ற பல்வேறு சிறப்புப் பகுதிகளில் பெண்களுக்குப் பயிற்சி அளித்தல்.
• சுழலும் நிதி (RF) & சமூக முதலீட்டு நிதி (CIF): SHGகளுக்கு வேண்டிய பணி மூலதனத்திற்கும் மற்றும் SHG கூட்டமைப்புகளுக்கு கூட்டு நடவடிக்கைகளுக்கும் என்று நிதி உதவி வழங்குதல்.

சமீபத்திய வளர்ச்சிகள் (FY 2023-24):

• கடன் வழங்கல்கள்: 2023 ஆம் ஆண்டின் டிசம்பர் மாத நிலவரப்படி, 39 லட்சம் சுய உதவிக் குழுக்கள் ₹1.12 லட்சம் கோடி கடன்களைப் பெற்றுள்ளன.

மகிளா கிசான் அதிகாரமளித்தல்:

• 31.03 லட்சம் பெண் விவசாயிகள் வேளாண்-சுற்றுச்சூழல் நடைமுறை ரீதியிலான தலையீடுகளின் கீழ் உள்ளனர்.
• 21.84 லட்சம் குடும்பங்கள் ஊட்டச்சத்து மிக்க வேளாண் தோட்டங்களைக் கொண்டுள்ளன.
• பண்ணை வாழ்வாதாரத் தலையீடுகளின் கீழ் 1,16,284 கிராமங்கள் உள்ளன.
• 5.76 லட்சம் பெண் விவசாயிகள், உழவர் உற்பத்தியாளர் அமைப்புகளாக (FPOs) ஒழுங்கமைக்கப் பட்டுள்ளனர்.

பண்ணை வாழ்வாதாரத் தலையீடுகள்:

• மஹிளா கிசான் சசக்திகரன் பரியோஜனா (MKSP): சமூக நிறுவனங்களை வலுப்படுத்துவதன் மூலமும், நிலையான விவசாயத்தை ஊக்குவிப்பதன் மூலமும் பெண் விவசாயிகளை மேம்படுத்துவதை நோக்கமாகக் கொண்ட துணைக் கூறாகும்.

• தீவிரத் தொகுதிகளில் பண்ணை வாழ்வாதாரங்கள்: இலக்குப் பகுதிகளில் நிலையான விவசாயம், கால்நடைகள் மற்றும் மரமற்ற வனப் பொருட்களை (NTFP) ஊக்குவித்தல்.
• கரிம வேளாண்மை மற்றும் மதிப்புச் சங்கிலிகள்: கரிம வேளாண்மையை ஊக்குவித்தல், பண்ணை மதிப்புச் சங்கிலிகளை உருவாக்குதல் மற்றும் சந்தைகளுக்குச் சிறந்த அணுகலுக்கான சந்தை இணைப்புகளை வழங்குதல்.

செயல்படுத்தல்:

• இந்தத் திட்டம், மாநில ஊரக வாழ்வாதார இயக்கங்கள் (SRLMs) மற்றும் மாவட்டப் பணி மேலாண்மை அலகுகளால் (DMMUs) மேற்பார்வையிடப்பட்டு, நாடு முழுவதும் படிப்படியாக செயல்படுத்தப்படுகிறது.
• மாவட்ட நிர்வாகத்தின் வழிகாட்டுதலின் தொகுதித் திட்ட மேலாண்மை அலகுகளால் (BMMUs) உள்ளூர் அளவிலானச் செயல்படுத்தல் மேற்கொள்ளப்படுகிறது.
• கட்ட விரிவாக்கம்: இந்தத் திட்டம் 2023-24 ஆம் ஆண்டிற்குள் அனைத்துக் கிராமப்புற ஏழைக் குடும்பங்களையும் அணி திரட்டுவதை நோக்கமாகக் கொண்டுள்ளது.

3. தீன்தயாள் அந்த்யோதய யோஜனா - தேசிய நகர்ப்புற வாழ்வாதார இயக்கம் (DAY-NULM)

தொடங்கப்பட்ட தினம்:

• செப்டம்பர் 23, 2013.

அமைச்சகம் அல்லது தலைமை முகமை:

• வீட்டுவசதி மற்றும் நகர்ப்புற விவகாரத் துறை அமைச்சகம், இந்திய அரசு.

திட்டம் மற்றும் குறிக்கோள்கள்

• தீன்தயாள் அந்த்யோதய யோஜனா - தேசிய நகர்ப்புற வாழ்வாதார திட்டம் (DAY-NULM) என்றும் அறியப்படுகிற தேசிய நகர்ப்புற வாழ்வாதார திட்டம் (NULM) நகர்ப்புற ஏழை குடும்பங்களிடையே வறுமை மற்றும் பாதிப்பைக் குறைக்க இந்திய அரசாங்கத்தால் தொடங்கப்பட்ட ஒரு திட்டம் சார்ந்த முன்னெடுப்பாகும்.

• நகர்ப்புற ஏழைகளின் வாழ்வாதாரத்தை மேம்படுத்துவதன் மூலம் சுயவேலைவாய்ப்பு மற்றும் திறமையான ஊதிய வேலை வாய்ப்புகளை வழங்குவதே இந்தத் திட்டத்தின் முதன்மையான நோக்கமாகும்.

அதன் முக்கிய நோக்கங்கள் பின்வருமாறு:

• நகர்ப்புற ஏழைகளுக்கு அதிகாரமளித்தல்: திறன் மேம்பாடு, சுயவேலை வாய்ப்புகள் மற்றும் நிலையான வருமான ஆதாரங்களுக்கான அணுகலை வழங்குவதன் மூலம் நகர்ப்புற ஏழைகளின் வாழ்வாதாரத்தை மேம்படுத்துவதை இது நோக்கமாகக் கொண்டுள்ளது.
• தெரு வியாபாரிகளுக்கான ஆதரவு: இது நகர்ப்புற தெருவோர வியாபாரிகளின் வாழ்வாதார சவால்களை நிவர்த்தி செய்கிறது, அவர்களுக்குப் பொருத்தமான விற்பனை இடங்கள், நிறுவன நிதி மற்றும் சமூகப் பாதுகாப்புச் சலுகைகள் கிடைப்பதை உறுதி செய்கிறது.
• சமூக பாதுகாப்பு: நகர்ப்புற ஏழைகளுக்கு வீட்டு வசதி, சுகாதாரம் மற்றும் கல்விக்கான அணுகலை உறுதி செய்கிறது.
• பொருளாதார உள்ளடக்கத்தை உருவாக்குதல்: திறன் மேம்பாடு மற்றும் தொழில்முனைவு மூலம் நகர்ப்புற ஏழைகளுக்கு முக்கியமாகப் பொருளாதாரத்தில் ஈடுபடுவதற்கான வாய்ப்புகளை வழங்குதல்.

இலக்குப் பயனாளிகள்

• வீடற்ற தனிநபர்கள்: நிரந்தரத் தங்குமிடங்கள் இல்லாமல் தெருக்களில் வாழும் மக்கள்.
• தெரு வியாபாரிகள்: பொது இடங்களில் பொருட்கள் மற்றும் சேவைகளை விற்பனை செய்யும் முறைசாராத தொழிலாளர்கள்.
• நகர்ப்புற ஏழைகள்: நகரங்களில் தங்களின் பொருளாதார நிலையை மேம்படுத்த ஆதரவு தேவைப் படுகிற குறைந்த வருமானம் கொண்ட குடும்பங்கள்.

தகுதி அளவுகோல்கள்

திட்டத்திற்கான இலக்கு குழுக்களில் பின்வருவன அடங்கும்:

• வீடற்ற தனிநபர்கள்: நகர்ப்புறங்களில் நிரந்தர வீடுகள் இல்லாத மக்கள்.
• தெரு வியாபாரிகள்: தங்கள் வாழ்வாதாரத்திற்காக தெருக்களை நம்பியிருக்கும் முறைசாரா விற்பனையாளர்கள்.
• நகர்ப்புற ஏழைக் குடும்பங்கள்: நகர்ப்புறங்களில் வசிக்கும் மக்கள், அதிலும் முதன்மையாக பட்டியலிடப்பட்டச் சாதியினர், பட்டியலிடப்பட்டப் பழங்குடியினர், பெண்கள், சிறுபான்மையினர் மற்றும் மாற்றுத் திறனாளிகள் உள்ளிட்ட பின்தங்கிய குழுக்களைச் சேர்ந்தவர்கள்.

முக்கிய அம்சங்கள் மற்றும் நன்மைகள்

நிதி ஆதரவு:

• சுய உதவிக் குழுக்கள் (SHGs): நகர்ப்புற ஏழை SHGகள் குறைந்த வட்டியில் கடன்களை அணுகலாம் (ஆண்டுதோறும் 7%) என்பதோடு பெண்கள் தலைமையிலான குழுக்களுக்கு கூடுதலாக 3% வட்டி மானியம் என்ற வகையில் இது பயனுள்ள விகிதத்தை சுமார் 4% ஆகக் குறைக்கிறது.

• சுயதொழில் ஆதரவு: குறுந்தொழில்களைத் தொடங்க விரும்பும் தனிநபர்கள் மற்றும் குழுக்கள் ₹2 லட்சம் (தனிப்பட்ட முயற்சிகளுக்கு) அல்லது ₹10 லட்சம் (குழு முயற்சிகளுக்கு) வரை கடன் பெறலாம்.
• தெருவோர வியாபாரிகளுக்கான உதவி: விற்பனை மண்டலங்களை நிறுவுவதற்கான நிதி உதவி, கடன் அணுகல், திறன் பயிற்சி மற்றும் குறு நிறுவன மேம்பாட்டிற்கான நிதி உதவி வழங்கப் படுகிறது.

நிதி அல்லாத ஆதரவு:

• தெரு வியாபாரிகள்: விற்பனையாளர்களுக்கான வேலை நிலைமைகளை மேம்படுத்த அத்தியாவசிய உள்கட்டமைப்பு (நீர் வழங்கல், சாலைகள், விளக்குகள், கழிவுகளை அகற்றுதல்) கொண்ட விற்பனை மண்டலங்களை மேம்படுத்துதல்.
• நகர்ப்புற வீடற்றவர்களுக்கான தங்குமிடம்: வீடற்ற நபர்களுக்கு அத்தியாவசியச் சேவைகளுடன் கூடிய நிரந்தரத் தங்குமிடங்களை அமைப்பதற்கும், இயக்குவதற்கும் மற்றும் நிர்வகிப்பதற்கும் நகர்ப்புற உள்ளாட்சி அமைப்புகளுக்கு (ULBs) தேவையான உதவியை வழங்குகிறது.

• திறன் மேம்பாடு: வேலைவாய்ப்பை அதிகரிக்க அல்லது புதிய தொழில் தொடங்க உதவும் விரிவான பயிற்சித் திட்டங்கள்.

DAY-NULM திட்டத்தின் கீழ் துணைத் திட்டங்கள்

• புதுமையான மற்றும் சிறப்புத் திட்டங்கள் (ISP): வாழ்வாதாரத்தை உருவாக்குவதற்கான புதிய அணுகுமுறைகளை ஊக்குவிப்பதோடு மொத்த மத்திய நிதியில் 5% வரையில் சிறப்புத் திட்டங்களுக்கு ஒதுக்கப் படுகிறது.
• சுய-வேலைவாய்ப்புத் திட்டம் (SEP): தனிநபர்கள் மற்றும் சுய உதவிக் குழுக்களுக்கு வழங்கப் படும் கடன்களுடன், சுயதொழில் மற்றும் குறுந்தொழில் வளர்ச்சிக்கான நிதி உதவியையும் வழங்குகிறது.

• நகர்ப்புறத் தெரு விற்பனையாளர்களுக்கான ஆதரவு (SUSV): நிதி உதவி, பயிற்சி மற்றும் பொருத்தமான விற்பனை இடங்களை உருவாக்குவதன் மூலம் தெரு வியாபாரிகளின் வேலை நிலைமைகளை மேம்படுத்துவதை நோக்கமாகக் கொண்டுள்ளது.
• திறன் மேம்பாடு மற்றும் பயிற்சி (CBT): நகர்ப்புற வறுமை ஒழிப்பில் ஈடுபட்டுள்ள தனிநபர்கள் மற்றும் நிறுவனங்களுக்கு அவர்களின் திறன்கள் மற்றும் வறுமை-குறைப்பு உத்திகளை செயல்படுத்தும் திறனை மேம்படுத்த பயிற்சி அளிக்கிறது.
• சமூக அணிதிரட்டல் மற்றும் நிறுவன மேம்பாடு (SM&ID): நிதி மற்றும் சமூகச் சேவைகளுக்கான அணுகலை மேம்படுத்துவதற்காக SHGகள் மற்றும் கூட்டமைப்புகளை உருவாக்குவதன் மூலம் நகர்ப்புற ஏழைகளுக்கு அதிகாரமளிப்பதில் கவனம் செலுத்துகிறது.
• நகர்ப்புற வீடற்றவர்களுக்கான தங்குமிடம் (SUH): நகர்ப்புற வீடற்றத் தனிநபர்களுக்கு அடிப்படைச் சேவைகளுடன் கூடிய தங்குமிடங்களை அணுகுவதை உறுதி செய்கிறது.
• திறன் பயிற்சி மற்றும் வேலை வழங்குதலின் (EST&P) மூலம் வேலைவாய்ப்பு: திறன் மேம்பாட்டிற்கான பயிற்சியை வழங்குவதோடு தனி நபர்கள் சிறந்த வேலை வாய்ப்புகளைப் பெற அல்லது அவர்களின் சொந்தத் தொழில்களை அமைக்க உதவுகிறது.

NULM திட்டத்தின் நன்மைகள் (DAY-NULM)

நிதி நன்மைகள்:

• குறைந்த வட்டிக் கடன்கள்: சுய உதவிக் குழுக்கள் மற்றும் குறு நிறுவனங்களுக்கு 4-7% வரை குறைந்த வட்டி விகிதங்களைக் கொண்ட கடன்கள் வழங்கப் படுகின்றன.
• தெரு விற்பனையாளர்களுக்கான ஆதரவு: கடன், திறன் மற்றும் விற்பனையாளர்களுக்கான சந்தை மேம்பாட்டு ஆதரவுக்கான அணுகலை அளிக்கிறது.
• சுய தொழில் கடன்கள்: நகர்ப்புற ஏழைகள் தங்கள் சொந்தத் தொழில்கள் அல்லது குறு நிறுவனங்களைத் தொடங்க உதவுகிறது.

நிதி அல்லாத பலன்கள்:

• தெருவோர வியாபாரிகளுக்கான உள்கட்டமைப்பு மேம்பாடு: முறையான உள்கட்டமைப்புடன் நியமிக்கப்பட்ட விற்பனை மண்டலங்களை வழங்குதல்.
• வீடற்றவர்களுக்கான தங்குமிடம்: அத்தியாவசியச் சேவைகளுடன் நிரந்தரத் தங்குமிடங்களை அமைத்தல்.
• திறன் மேம்பாடு: சிறந்த வேலைவாய்ப்பு மற்றும் தொழில் முனைவோர் வாய்ப்புகளுக்கான திறன் மேம்பாடு.